കുവൈറ്റിലെ മലയാളി പ്രവാസികൾക്കിടയിലും വലിയ ചർച്ചാ വിഷയമായി മാറിയിരിക്കുകയാണ് പശ്ചിമഘട്ട പരിസ്ഥിതി ലോല മേഖല (ഇ.എസ്.എ) സംബന്ധിച്ച അന്തിമ വിജ്ഞാപനം. കരട് വിജ്ഞാപനത്തിൽ പരാതികളും നിർദേശങ്ങളും സമർപ്പിക്കാനുള്ള സമയപരിധി അവസാനിച്ചതോടെ, ഇടുക്കിയടക്കമുള്ള മലയോര ജില്ലകൾ അന്തിമ വിജ്ഞാപനം എന്താകുമെന്ന ആശങ്കയിലാണ്. സംസ്ഥാന സർക്കാർ കേന്ദ്ര വനം-പരിസ്ഥിതി മന്ത്രാലയത്തിന് നിർദേശങ്ങൾ അടങ്ങിയ സത്യവാങ്മൂലം സമർപ്പിച്ചിട്ടുണ്ട്.
കരട് വിജ്ഞാപനത്തിൽ ഉൾപ്പെട്ട 131 വില്ലേജുകളിൽ 33 എണ്ണത്തെ പൂർണമായും പരിസ്ഥിതി ലോല മേഖലയിൽനിന്ന് ഒഴിവാക്കണമെന്നാണ് സംസ്ഥാന സർക്കാരിന്റെ പ്രധാന ആവശ്യം. ഇതിൽ 23 വില്ലേജുകളും ഇടുക്കി ജില്ലയിലാണ്. 2024-ൽ സംസ്ഥാന സർക്കാർ സമർപ്പിച്ച ശുപാർശയിൽ ഇടുക്കി, വയനാട് ജില്ലകളിലെ 31 വില്ലേജുകളെ ഇ.എസ്.എയിൽ നിന്ന് ഒഴിവാക്കണമെന്ന് ആവശ്യപ്പെട്ടിരുന്നെങ്കിലും കേന്ദ്രം അത് തള്ളിയിരുന്നു. സംസ്ഥാനത്ത് 8590.69 ചതുരശ്ര കിലോമീറ്ററായി ഇ.എസ്.എ നിജപ്പെടുത്തണമെന്നും സർക്കാർ നിർദേശിക്കുന്നു.
- കരടിൽ ഉൾപ്പെട്ട 131 വില്ലേജുകളിൽ 33 എണ്ണത്തെ ഇ.എസ്.എയിൽ നിന്ന് പൂർണമായും ഒഴിവാക്കണം (ഇതിൽ 23 എണ്ണം ഇടുക്കിയിൽ).
- ഇടുക്കിയിലെ 26 വില്ലേജുകളിൽ ഉൾപ്പെടുന്ന 856 ചതുരശ്ര കിലോമീറ്റർ കാർഡമം ഹിൽ റിസർവ് (CHR) മേഖലയെ ഇ.എസ്.എയിൽ നിന്ന് ഒഴിവാക്കണം.
- ജനവാസ, കാർഷിക മേഖലകളെ പൂർണ്ണമായും ഇ.എസ്.എ പരിധിയിൽ നിന്ന് ഒഴിവാക്കണം.
- വില്ലേജിനെ ഇ.എസ്.എയുടെ യൂണിറ്റായി കണക്കാക്കാതെ, ഭൂമിശാസ്ത്രപരമായ തുടർച്ചയില്ലാത്ത പ്രദേശങ്ങളെ ഒഴിവാക്കണം.
കൊക്കയാർ, ചക്കുപള്ളം, ആനവിലാസം, അയ്യപ്പൻകോവിൽ, അണക്കര, കട്ടപ്പന, പാമ്പാടുംപാറ, അറക്കുളം, ഏലപ്പാറ, തങ്കമണി, കൽകൂന്തൽ, പാറത്തോട്, ഉപ്പുതോട്, ഉടുമ്പൻചോല, വാത്തിക്കുടി, ചതുരംഗപ്പാറ, കാന്തിപ്പാറ, കൊന്നത്തടി, രാജാക്കാട്, രാജകുമാരി, കുഞ്ചിത്തണ്ണി, കരുണാപുരം, വണ്ടൻമേട് തുടങ്ങിയ ഇടുക്കിയിലെ നിരവധി വില്ലേജുകളാണ് ഈ വിഷയത്തിൽ ആശങ്കയോടെ ഉറ്റുനോക്കുന്നത്. കേരളത്തിന്റെ ഈ ആവശ്യങ്ങൾ കേന്ദ്രം പരിഗണിക്കുമോ എന്ന് അന്തിമ വിജ്ഞാപനം പുറത്തുവരുമ്പോൾ മാത്രമേ വ്യക്തമാകൂ. തങ്ങളുടെ കുടുംബങ്ങളെയും ഭൂമിയെയും നേരിട്ട് ബാധിക്കുന്ന ഈ വിഷയത്തിൽ അനുകൂലമായ തീരുമാനം ഉണ്ടാകുമെന്ന പ്രതീക്ഷയിലാണ് പ്രവാസികളടക്കമുള്ള മലയോര നിവാസികൾ.
