കേരള ഭാഗ്യക്കുറിയുടെ തിരുവോണം ബംപർ നറുക്കെടുപ്പിൽ ഒന്നാം സമ്മാനമായ 30 കോടി രൂപ TL 360615 എന്ന ടിക്കറ്റിന് ലഭിച്ചു. കണ്ണൂരിലെ അനീഷ് എന്ന ഏജന്റ് വിറ്റ ടിക്കറ്റാണ് ഈ മഹാഭാഗ്യം നേടിയതെന്ന പ്രാഥമിക വിവരങ്ങൾ പുറത്തുവന്നു. കേരളത്തിലെയും ലോകമെമ്പാടുമുള്ള മലയാളി പ്രവാസികൾ ആകാംഷയോടെ കാത്തിരുന്ന ഫലമാണ് ഇപ്പോൾ പ്രഖ്യാപിച്ചിരിക്കുന്നത്.
ഈ വർഷം അച്ചടിച്ച 90 ലക്ഷം തിരുവോണം ബംപർ ടിക്കറ്റുകളും വിറ്റുതീർന്നത് ലോട്ടറി വകുപ്പിന് വലിയ നേട്ടമാണ് സമ്മാനിച്ചത്. ടിക്കറ്റ് വിൽപ്പനയിലൂടെ സർക്കാരിന് ഏകദേശം 450 കോടി രൂപയാണ് ലഭിച്ചത്. എന്നാൽ, സമ്മാനത്തുക, ജിഎസ്ടി, അച്ചടി ചെലവുകൾ എന്നിവയ്ക്കായി വലിയൊരു തുക ചെലവഴിക്കേണ്ടി വരും. ഒന്നാം സമ്മാനം ലഭിക്കുന്ന വ്യക്തിക്ക് നികുതികളും ഏജന്റ് കമ്മീഷനും കിഴിച്ചുള്ള തുകയാണ് അക്കൗണ്ടിൽ എത്തുക.
30 കോടി രൂപയുടെ ഒന്നാം സമ്മാനത്തിൽ നിന്ന് വിവിധ കിഴിവുകൾക്ക് ശേഷം ഭാഗ്യശാലിക്ക് ലഭിക്കുന്ന തുക ഇങ്ങനെയാണ്:
- ഏജന്റ് കമ്മീഷൻ: 10 ശതമാനം (3 കോടി രൂപ)
- ബാക്കിയുള്ള 27 കോടി രൂപയിൽ നിന്ന് ആദായനികുതി: 30 ശതമാനം
- സർചാർജ്: 25 ശതമാനം
- ആരോഗ്യ, വിദ്യാഭ്യാസ സെസ്: 4 ശതമാനം
- മൊത്തം നികുതി കിഴിവുകൾ: ഏകദേശം 10.53 കോടി രൂപ
- ഭാഗ്യശാലിക്ക് അക്കൗണ്ടിൽ ലഭിക്കുന്ന അന്തിമ തുക: 16.47 കോടി രൂപ
കുവൈറ്റിലെ മലയാളി പ്രവാസികൾക്കിടയിലും കേരള ലോട്ടറിക്ക് വലിയ പ്രചാരമുണ്ട്. പലരും നാട്ടിലുള്ള ബന്ധുക്കൾ വഴി ടിക്കറ്റുകൾ എടുക്കാറുണ്ട്. ഈ വലിയ സമ്മാനം നേടിയ ഭാഗ്യശാലിയെക്കുറിച്ചുള്ള കൂടുതൽ വിവരങ്ങൾക്കായി കാത്തിരിക്കുകയാണ് ഇപ്പോൾ കേരളം.
